كنت فاكر نفسي مش عبيط

(باللهجة العامية المصرية)

الباص كان زحمة والواد العبيط بيبيع مناديل ودبابيس ومحافظ فاضية ، هاهاهاي مين اللي راح يشتري محفظة فاضية ،واكيد كل الناس عايزة تشتري محفظة مليانة.
والولية الواقفة بالممشى وشايلة ابنها ، والراجل الجالس على الكرسي مطنش، وعامل نفسه نايم، وهي مستحملة الوقفة، يمكن واحد من الطيبين يقوم ويقولها اتفضلي، بس هي عبيطة والراجل مكار.
سواق الباص عامل نفسه طرزان والكمساري وزير مالية السواق، عبيط والكمساري مكار لان لو هو طرزان مكانش اشتغل سواق والكمساري مكار لانه بينكر انه معاه فكة ويلهف الباقي.
والواد اللي فى الكرسي الاخير بيوشوش البت فى ودنها مش عارف بيقولها ايه، وهي فاضحاه بتعابير وشها، الواد مكار والبت عبيطة. لانه بيكذب عليها وهي عبيطة لانها مصدقاه.
نشال لازق جامد فى الراكب، والراكب عارف انه بيتنشل بس هو مكار والنشال عبيط ليييييه

المكار حاطط المرتب فى الجوارب والنشال العبيط بيدور فى جيوبه الفاضية
الباص بيتمرجح الباص فرمل الناس اتكربست على بعضها الا واحد مكار لانه تمسك بالشماعة انا شايفه بس هو عبيط ليييييييه لان الشماعة ما استحملتش حجمه وهو تخين
وانا اللي كنت فاكر نفسي مش عبيط الظاهر نسيت نفسي واتنطرت برة الباص
ونزلت واقف على رجليا وابتديت مشوار جديد مع ناس نصها عبيط والنص التاني مكار